Sejarah Partangiangan Nababan

SEJARAH PARTANGIANGAN, 13 OKTOBER 1955 BORSAK MANGATASI NABABAN, BORU, BERE  DI SIBORONG-BORONG TAPANULI UTARA

             Logo Marga Nababan

Mauliate ma di angka Natua-tua Angka sundut naparjoloi, napatomu-tomu DOSNIROHA, mamilang-milangi, Pamanathon, mamparungkilhon sitaonon namasa songon di Pomparan ni MARGA NABABAN, BORU, BERE jala mangalului jalan keluar songon Pangondian ima : Pamanathon Pangalaho / Impola ni Holong ni Roha Pamanathon Angka Ragam ni si Bonsiri Namasai Mangantusi namasai songon sitaonon ni sude / sada sitaonon Asa Masiantoan di bagasan tanggung jawab nasintong Pasadahon Pangantusion di lapatan dohot di Gogo ni Tangiang na Mangolu tu Debata, ima songon Haluaon naboi paruarhon MARGA NABABAN ,BORU, BERE sian parungkilon asa las ni roha Asa sian DOSNIROHA dohot TAHI namansai denggan, dipatupa PARTANGINGAN I, di Siborong-borong, Tapanuli Utara Sumatera Utara di Tanggal 13 Oktober 1955 nasalpu IA SEJARAH NI PARTANGIANGAN I TARHIRA SONGON ON MA :

Dung Tangkas angka pangantusioni diangka natua-tua sundut naparjolo, dipanghorhon ni pangonai ni sitaonon i, ima naung pola sahat tu pangalaho namandele, diuji angka natua-tua namangadopi namasa ima mamingkirhon aha ma si EAHAN laho PASADAHON, PADOMUHON, angka NAMASIHAHOLONGAN, manangkasi jala mamparungkilhon sude parngoluon i, isarani pangalaho HAGABEON,HAMAJUON,HAMORAON lan dope tahe.
Pangalaho na lam so ture, mamboan Marga Nababan tu ngolu Parsirangon, Parbolatan, Hosom dohot tu Dosa namansai jorbut, Holongi nungga lam so paltak be jala nungga tung sanga sobu jala jorbut hian ianggo hosomi di parsirangani par Haha Maranggion ima naung sanga adong Nababan Dolok dohot Nababan Toruan.
Taringot tu Parpinorparon, tung mansai na hansit do, jala songon Tarombo nasongon on ma : Opat Ompunta Borsak Mangatasi namarhaha maranggi ( Anak ni Toga Sihombing ) ima : BORSAK JUNJUNGAN (SILABAN), BORSAK SIRUMONGGUR (LUMBAN TORUAN), BORSAK MANGATASI (NABABAN), BORSAK BIMBINAN (HUTASOIT). Ia anak ni Omputta BORSAK MANGATASI Opat hali Holan Anak sasada ima : SIANTAR JULU, Anak nama SIANTAR JAE, Anak Siantar Jae ima TUAN SI SOGO SOGO, jala anak ni TUAN SISOGO SOGO ima OMPU DOMI RAJA, asa dung pe sian OMPUNTA DOMI RAJA asa adong anak na dua ima : SANDAR NAGODANG dohot TUAN SIRUMONGGUR, jala naduaon ma manorushon Tarombo ni NABABAN sahat tu sadarion, jala molo tapaihut-ihut pardalanan ni parpinorparon i, tung mansai godang do idaon panghorhonni pangalaho namansai jorbuti, ima patunda ni angka Dosai ima naso rap ris dihagabeoni, atik pe naung adong Marnomor 24, alai mangolu dope namar nomor 14, jala atik pe anggi ni partubu alai nungnga sude be marompung tusi.
Taringot tu Parngoluon ( Taraf Hidup ), tung pardosdosan do anggo hapogoson i, ai tung adong sada –sada naboi mangan, ndada tardok dopei/ tarpatudos tu angka ngoluni namaduma.Umum na martani do / mangula tu balian, jala hinorhon ni namarsiguluti di angka parbalohan, masisoluhan, sialani angka parbagianan, alani ma godang lalap masielatan, hosom jala godang na bungkas sian Bona Pasogit tu angka luat naasing, marserak mamboan hosom, mangguruhon hadatuon/ habeguon songon modal mampartahanhon ngolu. Tarombo ipe ndang ringkot bei ai holan patubu hansit ni roha namai jala pasunggul-sunggul hinadangol, alani do umbaen naso pola hantus sipata nang angka Taromboi pe di torop pomparan ni omputta.
Taringot tu Hapistaran / Hamajuon / Hasangapon, tung mansai namaol doi dapot, ima ala panosak ni hapogoson ni, ai tung soadong be laho rohapasingkolahon Ianakhon, alai anggo marguru Hadatuon dohot Ulaon Haholomoni tung mansai ringkot doi laho manjamothon serangan sian duru dohot sian bagasan / pardongan tubuon. Molo pe tung adong sada-sada na berjiwa maju, naolo marungkil pasingkolahon angka Ianakhonna, bahira-hira naeng dapot sa naniluluanna, sai manigor mate maon poso. Molo tapamanat tahe sundut angka naparjoloi nungnga be tung garang parrohaon i, hagogoon, balgani botohon, teal, late, hosom inama tujuan, atik pe naung ro ha Kristenon, tung hira so parduli do idaon, ndang adong biar na tu angka sapata / dosa. Tung godang do tahe naso tarpaboa-boa taringot tu pangalaho naung sanga segai, gari sundut Naumposo nungnga hira pangkat tahe molo didok SINABABAN PANGEMOR, MANANG SI PITU ARU-ARU, BANDIT BUTAR ai SAE DO UTANG MOLO DUNG DI BOAN JAGAL GODANG (Juhut balga/godang).
Haporseaon, tardok ma hira SIPELEBEGU dope angka Ompunta naparjoloi, atik pe nungnga ro Barita Nauli, tung mansai bangkol do nasida olo Porsea, jala molo dijalo nasida Barita Nauli i, ndang apala manigor marlapatan di ngoluna, ai tung sohot dope haporseaon habatahon i, jala idopeanggo tung namangula, jala molo tung adong idaon Martumbur holongi, datung sian panghorhon ni Barita Nauli dope, alai holong parmudaron dope Dung tangkas saluhut angka namasai di pangantusion ni angka Natu-tua napajolo, dihilala ma tung mansai porlu si tutu patupahon sada Uaha tu dos ni roha ima namangeahi hasadon dina MARHAHA MARANGGI, DINAMARBORU, DOHOT DIIANAKHON, sian dos ni roha ni angka natua-tua, dipatupa ma Ulaon PARTANGIANGAN i, ima di ari 13.10.1955 na salpu di Siborong-borong, ima laho mangido Pasu-pasu tu sude Raja nidongan Tubu, Hula-hula, Raja naliat nalolo tarlumobi ma tu Joloni Debata, asa tung dilehon pasu-pasu marhite-hite angka tangiang ni angka Raja, nang angka Parhalado ni huria, dibagasan elek-elek dohot Ilu-ilu Pomparan ni BORSAK MANGATASI, ANAK, BORU, BERE, IBABERE mangido tu jolo ni Tuhan Pardenggan basai ragam ni Pasu-pasu Nai. Dung denggan singkop marsipanganon, jala sahat angka Parjambaran denggan tu hasahatanna, denggan mardalan ulaon i, mardame ma sude, ndang hasurahan.Ojahan ni Partangiangani ima Psalmen 133:1-3. Tung dengan situtu do diida si Jabu-jabu Tangiangon di Tangiang na songon Ojahan di hasadaon dohot hadameon. Jala si Jabu-jabu on natardok pelopor di hasasaut ni Partangiangan ni Nababan i, Disosohon do di siganup taon di patupa partangiangan si songon i di lunggu huta, nang pe marsasahalak, ima di ganup tanggal 13 Oktober ganup taon, sian dos ni roha di pesanhon do tu sude Pomparan ni Borsak Mangatasi Nababan ima:
Asa Mangula di Bagasan ngolu na MAR TUHAN Asa Unang be Adong namandok Adong NABABAN DOLOK dohot NABABAN TORUAN Asa unang adong namangasahon GOGO, HUASO, SINADONGAN, LATE, TEAL ,ELAT nang HOSOM Asa MARSIURUPAN jala MARSITOGU-TOGUAN Asa Martutur hombar tu Taromboi.
Di Taon 1980 di Patupa Ulang Taon Partangiangan di Si Borong-borong, ima Jubeleum na 25 taonhon, jala di pesanhon asa MARHASEREPON, MARTORUK NI ROHA, BURJU MARTANGIANG jala MARROHA MAULIATE tu DEBATA NABASAI. Dibilangi do disi Torop ni Nababan, Boru, Bere namartitel nang na marsingkola na timbo, nungnga be torop nian, jala di Taon 1991 di patupa do PARRIAAN ni NABABAN, BORU, BERE, IBABERE di Jetun Silangit si Borong-borong ia Hasil ni Parriaan i ima:
Asa Marojahan di Poda Partangiangan taon 1955 na salpu sude Rumang ni Parsadaan ni NABABAN Patupa Program Jangka Pendek, menengah/panjang di sude Panggulmiton ni Parngoluan di Hamajuon ni Ulaon I Pangurus Harian, Pusat Daerah di sandok Portibion Pahantushon Tarombo / Paradaton  Ditolopi do LOGO ni NABABAN songon on :

LOGO PARTANGIANGAN BORSAK MANGATASI

Hatorangan ni Logo i songononma :
1 Pohon Baringin : Sada do Nababan
1 Bintang : Mar Tuhan
10 Laras Sinar : Bulan 10 (Oktober)
13 Akar Tunjang : Ari 13 (Tanggal 13)
2 Akar : Dua Anak ni Borsak Mangatasi ima Sandar Nagodang dohot Tuan Sirumonggur.
55 Gulungan Daun : Taon 1955.
4 Buhu di Batang Beringin : Opat Hali Anak Sasada ima : SIANTAR JULU, SIANTAR JAE, TUAN SISOGO-SOGO dohot OMPU DOMI RAJA
Di ihot Segitiga : Dalihan Natolu
Songonima sejarah ni Partangiangan Borsak Mangatasi Nababan, napinapungu-pungu sian beberapa sumber terutama : Amang St. J. Nababan /br Hutajulu ( 16 ) di Bagan Batu Riau ( Ketua Nababan Bagan Batu sekitarnya ), molo adong nahurang lobi mohon dimaafkan, hami pe paima masukan perihal Sejarah Partangiangan on, asa lam tu denggan na.

Sumber : nababan.wordpress.com_ditulis oleh : St. Samuel Manalu.BSc / br Nababan (17)